Furlan

L’ecomuseu al è une forme di museu dal dut gnove, di intindilu tant che un procès dinamic che al permet aes comunitâts di conservâ, interpretâ, dâ valôr al lôr patrimoni in funzion di un svilup sostenibil.

Al comprent une particolâr unitât gjeografiche dal teritori: il Cjamp di Osôf-Glemone, logât tal centri dal Friûl Vignesie Julie. Si trate di une plane aluvionâl circondade di rilêfs prealpins e di culinis. La origjin de sô formazion e je la aghe: di fat il Cjamp al derive di un grant lâc che si sprolungjave a mont des culinis morenichis, subit dopo che il glaçâr dal Tiliment si ritirà, uns 10.000 agns indaûr.

L’Ecomuseu des Aghis dal Glemonês, cui siei flums, torents, mulins, rostis, lavadôrs, al è deventât un museu a viert di visitâ a traviers di une rêt di percors che si puedin fâ a pît e in biciclete: lis tematichis si intrecin e a metin adun la identitât culturâl, lis finalitâts educativis, la promozion turistiche e economiche.

L’Ecomuseu si propon di documentâ, recuperâ e interpretâ la memorie storiche, la vite, lis personis e i fats, la culture materiâl e imateriâl, lis relazions fra ambient naturâl e ambient uman, lis tradizions, lis ativitâts, la maniere di vivi e di lavorâ, la produzion locâl; no ultin, cemût che i insediaments e lis oparis dal om a àn caraterizât la formazion e la evoluzion dal paisaç e dal teritori dal Cjamp di Osôf-Glemone.

Par plui informazions
ECOMUSEO DELLE ACQUE DEL GEMONESE
Largo Beorcje, 12 – Borgo Molino
33013 Gemona del Friuli (UD) Italy
info@ecomuseodelleacque.it